ភ្នំពេញ៖ រដ្ឋាភិបាលជប៉ុនផ្តល់ថវិកាសរុបចំនួន ៥២៧ ១២២ ដុល្លារអាមេរិកដល់កម្ពុជា សម្រាប់ការសាងសង់ស្ពាននៅក្នុងខេត្តកណ្តាល និងខេត្តក្រចេះ និងប្រព័ន្ធធារាសាស្ត្រនៅក្នុងខេត្តបន្ទាយមានជ័យ។
ឯកអគ្គរាជទូតប្រទេសជប៉ុនប្រចាំនៅកម្ពុជាលោក មិកាមិ ម៉ាសាហ៊ីរ៉ូ នៅក្នុងពិធីចុះហត្ថលេខាលើកិច្ចសន្យាផ្តល់ជំនួយឥតសំណងនេះបានឲ្យដឹងថា គម្រោងទី១ គឺការសាងសង់ស្ពានបេតុងនៅស្រុកកោះធំ ខេត្តកណ្តាល ដែលមានទឹកប្រាក់ជាង១២ម៉ឺនដុល្លារ សម្រាប់ការដាក់ជំនួសស្ពានឈើចាស់មួយកន្លែង ដែលបានសាងសង់កាលពីប្រហែល៧០ឆ្នាំមុន ដោយស្ពានបេតុងថ្មីវិញ សម្រាប់ជាអត្ថប្រយោជន៍ដល់ប្រជាជនធ្វើដំណើរឆ្លងកាត់ ដឹកជញ្ជូនកសិផលទៅផ្សារ សិស្សទៅកាន់សាលារៀនជាដើម។
គម្រោងទី២ គឺការសាងសង់ស្ពានបេតុងមួយកន្លែងដែលធន់នឹងទឹកជំនន់ នៅឃុំគោលាប់ ស្រុកចិត្របុរី ខេត្តក្រចេះ ក្នុងទឹកប្រាក់ជាង១៣ម៉ឺនដុល្លារ។ តាមរយៈគម្រោងនេះប្រជាពលរដ្ឋនៅក្នុងភូមិចំនួន៤ ដែលជារឿយៗមិនអាចធ្វើដំណើរចេញពីផ្ទះរបស់ពួកគាត់បាននៅរដូវវស្សា នឹងអាចមានលទ្ធភាពប្រើប្រាស់បរិក្ខារសាធារណៈនានាបានពេញមួយឆ្នាំ។ មិនតែប៉ុណ្ណោះ គម្រោងនេះនឹងលើកកម្ពស់សកម្មភាពរបស់កសិករ តាមរយៈការផ្តល់នូវផ្លូវដឹកជញ្ជូនប្រកបដោយសុវត្ថិភាពសម្រាប់ផលិតផលកសិកម្ម។
គម្រោងទី៣ គឺការជួសជុលទំនប់ទឹក និងទ្វារទឹកចំនួនពីរ និងការសាងសង់ទ្វារទឹកថ្មីចំនួនមួយ នៃប្រព័ន្ធធារាសាស្ត្រទានកាំ ក្នុងខេត្តបន្ទាយមានជ័យ ក្នុងទឹកប្រាក់ជាង២៦ម៉ឺនដុល្លារ ដើម្បីផ្គត់ផ្គង់ទឹកសម្រាប់កសិកម្ម និងការប្រើប្រាស់ប្រចាំថ្ងៃ មានស្ថេរភាពបានពេញមួយឆ្នាំ។ គម្រោងនេះនឹងផ្តល់អត្ថប្រយោជន៍ដោយផ្ទាល់ដល់ប្រជាពលរដ្ឋប្រមាណជាង៤ពាន់នាក់ ដែលបានរងគ្រោះដោយសារទឹកជំនន់ និងគ្រោះរាំងស្ងួត និងផ្តល់អត្ថប្រយោជន៍ដោយប្រយោលដល់ប្រជាពលរដ្ឋប្រមាណជាង៤ម៉ឺននាក់ ដែលបានជួបប្រទះការខ្វះខាតទឹកម្តងម្កាល ដោយសារតែការបង្ហូរទឹកពីទំនប់ធំផ្នែកខាងលើ មកទំនប់ទានកាំ៕
